Жазықбай Аханов
Жазықбай Аханов (1920 жылы, Сенек, Қарақия ауданы, Маңғыстау облысы – қайтыс болған жылы белгісіз, Алматы) — Ұлы Отан соғысының ардагері, полковник, Маршал Г. Жуковтың хатшысы.[1]
Өмірбаяны
[өңдеу | қайнарын өңдеу]1920 жылы Адай уезінде (қазіргі Қарақия ауданы) Сенек мекенінде дүниеге келген. Маңғыстауда Басыгүрлі, Жазыгүрлі, Тайғырдың қыры, Майемірдала жерлерін жайлаған Шоқтыбай байдың немересі. Әкесі мен атасының 3500 жылқысын кеңес үкіметі әкімдері 1928 жылы Дауысты-Дүкенді деген жерде тәркілейді. Әкесі мен атасы тағы басқа адамдармен Орта Азияға қоныс аударып 1930-33 жылдары аштықтан қайтыс болады.
Алғаш сауатын ағартушы-ақын, ғұлама Оразмағамбеттен ашады.
- 1930 жылы Ашғабад жетімдер үйіне қабылданады.
- 1930-40 жылдары он жылдық мектепті түрікмен тілінде үздік бітіреді.
- Ташкент заң институтын бітіріп, заңгер мамандығын алған. (1949).
- 1940 – 1941 жылдары Түрікменнің Ташауыз облысындағы түрікмен тілінде шығатын «Коммуна» газетінің редакторы, Ленин аудандық парткомының хатшысы болды.
- 1941 – 45 жылдары Ұлы Отан соғысына қатысқан. I Белорус майданы құрамында болған. 1945 жылы 9 мамырда Берлинда, Шперее өзенінің жағасында 243 жауынгер қатысқан садақа ұйымдастырады. 1945 жылғы 15 шілде мен 1 тамыз аралығында маршал Г.К. Жуковтың басшылығымен таңдаулы 250 жауынгер құрамында Потсдам конференциясына қатысқан.
- 1947 – 75 жылдары партия, кеңес, мемлекеттік қауіпсіздік қызметтерін атқарды.
- 1984 – 89 жылдары Ұлы Отан соғысы ардагерлерінің фермерлік шаруашылығының бас директоры болған.
- 1989 жылдан ардагерлер қоғамының төрағасы.
- 1992 жылы 29 қарашада Мәскеуде өткен «Москва түбінде фашистерді талқандаудың 50 жылдығы» жиналысына қатысқан. Маршал Г.К Жуков атындағы орден, медаль шығарып, ескерткіш орнату туралы маңызды ұсыныстар жасаған.
Марапаттары
[өңдеу | қайнарын өңдеу]- 3 рет Қызыл жұлдыз ордені
- 1-дәрежелі Отан соғысы ордені
- 2-дәрежелі Отан соғысы ордені
- "Ерлігі үшін", "Жауынгерлік қызметі үшін" секілді т.б. 18 медальдың иегері.[2]