Зиядин Исабеков

Зиядин Исабеков (6.3.1960, Арыс ауданы, Пахташы ауылы) — ғалым, тарих ғылым кандидаты (1993); спортшы, күрестің үш түрінен (дзюдо, самбо, Қазақ күресі) спорт шебері, КСРО-ның бірнеше дүркін чемпионы. Қоңырат тайпасының Құлшығаш руынан шыққан.

1983 жылы Қазақ Мемлекеттік Университетті бітірген. 1983-86 жылы Қазақ Мемлекеттік Университеттің Ыстықкөлдегі санаторийінде директор болды. 1986 жылы Желтоқсан қозғалысына қатысқандығы үшін жұмыстан босатылып, қудалауға ұшыраған. Дзюдодан Қазақстанның құрама командасының 10 жыл капитаны болды. 1987—91 жылы Шымкент педагогикалық институтында, 1991— 2000 жылы Түркістан қаласында Қожа Ахмет Ясауи атындағы Халықаралық қазақ-түрік университетінде ғылым педагогикалық жұмыстармен айналысты. Университетте Археология және этнология кафедрасын, Археология және эт¬нология ғылым-зерттеу институтын басқарады. Оңтүстік Қазақстан аумағынан 70-ке жуық жаңа Археологиялық нысандарды ашып зерттеді. 50 шақты ғылыми еңбектердің, соның ішінде 11 оқу бағдарламасы мен оқулықтардың, 1 монографияның авторы. 2002 жылдан бері Отырар өңірінің Археологиялық ескерткіштерін зерттеумен шұғылданып келеді. Ол аудан территориясынан 40-қа жуық жаңа нысандарды тауып, ғылыми айналымға енгізді. 2000 жылы Оңтүстік Қазақстан облысының Олимпиялық дайындық орталы¬ғының директоры. Мұнда ол Қазақстаннан бірнеше спортшылар (арасында әлем чемпиондары да бар) тәрбиелеп шығарды.