Илья Васильевич Каратаев

Илья Васильевич Каратаев(1922, Алматы облысы, Кербұлақ ауданы,Кривошеевка ауылы - 17.10.1944, Литва, Наумистис қаласы) - 2-дүниежүзілік соғысқа қатысушы, гвардия аға лейтенанты, взвод командирі. Кеңес әскері қатарына 1941 жылы шақырылған. Ол З-Витебск гвардиялық атқыштар дивизиясы құрамында ұрыстарға қатысты. 1944 жылы 21 тамызда олардың дивизиясының 5- және 6-батареяларына жаудың 14 танкісі шабуыл жасады. Жау Кеңес әскерінің қорғанысын бұзып өтсе, Блюшки және Урбанты деревнялары маңындағы алдыңғы бөлімдерді басқа бөлімдерден бөліп тастау қаупі төнді. Екі топқа бөлінген жау танкілері жауынгерлерден 300-500 м жердегі орман шетіне шықты. Олар пулемет пен зеңбіректен бората ок атып, батареяларға ұмтылды. 6-батареяны басқарған Каратаев жауынгерлері ерлікпен шайқасты. Батарея жанында 50 м жерде жаудың 4 танкісі жанып жатты. 1944 жылы 22 тамызда Урбантай деревнясындағы (Литва, Шакяй аудандары) шайқаста оның взводы жау шабуылын тойтарып, 14 танкісін, 3 машинасын өртеп, екеуін талқандады. Гвардия аға лейтенанты шайқас кезінде қаза тапты. Ұрыста көрсеткен ерлігі үшін Каратаевқа КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (24.3.1945). Ленин, 1-дәрежелі Отан соғысы ордендерімен, медальдармен марапатталған. Жаркент қаласында Каратаевқа ескерткіш-белгі орнатылып, Кербұлақ ауданы,Алтынемел атындағы көшеге есімі берілген.