Подольских Николай Артемьевич

Подольских Николай Артемьевич (20.1.1930 жылы туған, Орынбор облысы, Тоцкий ауданы, Марковка село) – партия, кәсіподақ қызметкері, Орынбор ауыл шаруашылық институтын бітірген (1965). 1949 – 50 жылдары Башқұрт АКСР-нің «Ақжар» кеңшарында механик, 1954 жылы қазіргі Түркістан облысының «Күйік» кеңшарында шеберхана механигі, бас механик, 1954 – 65 жылдары Қазалы ауыл шаруашылығын механикаландыру училищесінде мұғалім, училище директорының оқу-өндірістік жұмыс жөніндегі орынбасары, 1965 – 74 жылдары облысы парткомның ауыл шаруашылық бөлім меңгерушісінің орынбасары, меңгеруші, 1974 – 85 жылдары облыс партком хатшысы қызметтерін атқарды. 1980 – 81 жылдары Ауғанстанда СОКП ОК-нің кеңесшісі ретінде болды. 1985 – 91 жылдары Қызылорда облысы кәсіподақтар кеңесінің төрағасы. 1992 – 93 жылдары халық депутаттары облысы кеңесінің ауыл шаруашылық жөніндегі комиссиясының төрағасы қызметін атқарды. Екі мәрте Еңбек Қызыл Ту, «Халықтар достығы» (КСРО), «Халықтар достығы» (Ауғанстан) ордендерімен, медальдармен марапатталған. Қызылорда қаласының құрметті азаматы.