Солтүстік Қазақстан облыстық қуыршақ театры
| Солтүстік Қазақстан облыстық қуыршақ театры | |
|---|---|
| |
| Орналасуы |  ҚазақстанПетропавл |
| Негізделгені | 1990 |
| Директоры | Сергей Орлов |
| Көркемдік жетекшісі | Наталья Гузеева |
Солтүстік Қазақстан облыстық қуыршақ театры – Петропавл қаласындағы мәдени-сахналық ұжым, балаларға арналған қуыршақ театры.
Тарихы
1990 жылы 13 шілдеде облыстық әкімшілік мен қоғамдық ұйымдардың қолдауымен Петропавл қаласында ұйымдасып, 1991 жылы 15 ақпанында балаларға арналған алғашқы "Винни Пух и все, все, все..." атты спектаклімен театр шымылдығы ашылды. Осы жылы шығармашылық ұжым республикалық фестиваль-лаборатория "Дастарқан" және халықаралық қуыршақтар театрының жеңімпазы атанды. Театр ұжымын алғаш ұйымдастырушы әрі алғашқы режиссер Л. Архипов.
Театрдың репертуары балаларға арналған қуыршақ театрының классикалық туындыларымен (С.В. Михалков, "Үш торай") қатар ұлттық фольклор, осы заманғы жазушылардың пьесаларымен (С. Жүнісов, "Сәукеле"; А. Тойбаев, "Ұрпаққа өсиет"; С. Ефремов пен С. Коган, "Тағы да Қызыл телпек туралы", т.б.) толығып отырды. Театр ұжымы гастрольдік сапармен Болгарияда (1993), Ресейде (2001, Қорған қ-нда) өнер көрсетті, сондай-ақ Халықаралық фестивальдарға да (Мәскеу, Минск, 1993; Омбы, 1994; Түмен, 1996; Екатеринбург, Алматы, 2002;) қатысты. Театр бірнеше рет Құрмет дипломымен марапатталған.
Театр жетістіктері
Шығармашылық ұжымның орындаушылық шеберлігі әріптестері мен театр сыншылары тарапынан бірнеше мәрте жоғары бағаланды. Театр – Минскіде өткен халықаралық қуыршақ театрының лауреаты, Челябинскіде өткен "Соломенный жаворонок" II халықаралық қуыршақ театрлары фестивалінің, Ақтауда өткен I халықаралық "Ортеке" театр фестивалінің, Ақтөбеде өткен II халықаралық театр фестивалінің лауреаты.[1]
2011 жылы Әзірбайжан Республикасы тәуелсіздігінің 20 жылдығына арналып Бакуде өткен І халықаралық қуыршақ театрлары фестиваліне Қазақстан атынан қатысып, бірінші орын алды.
2012 жылы Солтүстік Қазақстан облысындағы мәдениет күндері, 2013 жылы XI "Наурыз 2013" түркі халықтарының халықаралық театрлар фестиваліне, III бүкіләлемдік қуыршақтар карнавалына, 2014 жылы Екатеринбург қаласында өткен "Коляда-Plays" заманауи драма театрлар фестиваліне, 2017 жылы Воронеждегі "Маршак" балалар фестиваліне, 2018 жылы Ақтөбе қаласында өткен "Ассалаумағалейкум" қуыршақтар театры фестиваліне қатысты.
Шығармашылық ұжымы
Театр директоры ҚР "Мәдениет қайраткері" белгісінің иегері Сергей Орлов. Труппа жетекшісі, актриса, сахна шебері Наталья Гузеева мен актер Андрей Зайцев - ҚР "Мәдениет қайраткерлері". Театр актерлері Айгүл Хасенова, Ольга Лабутина мен Сапар Мапенов - ҚР "Мәдениет саласының үздігі" белгісінің иегерлері.
Галерея
Дереккөздер
- ↑ Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9