Тауарды электрондық әдіспен сәйкестендіру

Тауарды электрондық әдіспен сәйкестендіру – көпшілік қолды тауарларды сәйкестендірудің көптеген елдер қабылдаған бірыңғай компьютерлендірілген жүйесі. Тауарларды нөмірлеудің халықаралық “EAN” қауымдастығы 1977 ж. тауарларды кодтаудың еуропаның жүйесін (EAN) күшіне енгізді. “EAN” тауарлық нөмірі 13 саннан (EAN-13) және символдан – алма-кезек күңгірт және ашық жолақтар түріндегі тік бұрыштан тұратын сызықшалы код болып табылады.

Көлемі шағын тауарларға 8 саннан тұратын (EAN-8) қысқа код соғылады. Сызықшалы код символы тауар туралы сәйкестендіруші ақпараттың сканермен есептеуге арналған‚ атап айтқанда‚ тауар топтамасына қызмет көрсетуді – түгендеуді‚ есептеуді‚ тауардың қозғалысы мен босалқы қорларын бақылауды ыңғайлы етуге‚ өнімді қоймаға жинауды оңайлатуға‚ т.б. арналған. Тауардың нөмірі сызықшалы код символының астына орналасқан 13 немесе 8 сан түрінде соғылады. Онда елдің коды (алғашқы 2 немесе 3 сан)‚ дайындаушының коды (одан кейінгі 4 немесе 5 сандар)‚ тауардың коды (одан кейінгі 5 сан) шифрленген. Кейбір елдердің кодтары: 00-09 АҚШ – Канада‚ 30 – 37 Франция‚ 40 – 43 Германия‚ 48 Қазақстан‚ 49 Жапония‚ 50 Ұлыбритания мен Солтүстік Ирландия‚ 52(0) Грекия‚ 54 Бельгия мен Люксембург‚ 80 – 83 Италия‚ 84 Испания‚ 86(9) Түркия‚ 93 Австрия.