Шалқошқар

Шалқошқар Әлібекұлы (шамамен 1770, қазіргі Қызылорда облысы Қазалы ауданы Бекарыстан би ауылы — 1811, қазіргі Арал ауданы Жаңақұрылыс ауылы ) — батыр, Кіші жүз әлім тайпасының шекті — кішкенесінен шыққан. Ел аузында сақталған аңыз-әнгімелерге қарағанда Шалқошқардың батырлығы, алып-күштілігі жас кезінен-ақ аңғарылған. Ағайын-туысқа өте сыйлы, қолы жомарт, дау-дамайды бітімгершілікпен шешетін ақылды адам болған. Түрікмендерге қарсы соғыстарға қатысып, олардың бейбіт жатқан елге тұтқиылдан жасаған шапқыншылықтарына өз жасақтарымен тойтарыс берген. Тұтқынға түскен адамдарды азат етіп, барымтадағы малды қайтарған.