Шикіл, шикіл сары

Шикіл, шикіл сары Түсіндірме сөздіктегі мағынасы — сап-сары, шикі сары. «Шет жақтан бір шикіл сары ...орысша мен татаршаны араластыра сымпылдады» (Ж. Тілеков, От кешу.). Бізге төркіні қажет болып отырғаны «сары» сөзінің алдындағы «шикіл» тұлғасы. Чуваш тілінде — «шакаал», якуттарда — «чыңқыл» сөздері біздегі «аса», «тым», «ерекше» үстеу сөздері орнына қолданылады. Тіпті якут тілінде «чыңкыл хара» тіркесі — тым қара мағынасын береді. Демек, бұл тілде тек «сары» сөзімен ғана емес, басқа да сөздермен (түсті білдіретін) тіркесетін қабылеті бар екен. Сонда, біздегі «шикіл сары»— өте сары, тым сары дегендерге мезгейді.