Қызылтамырша немесе артериола

Қызылтамырша немесе артериола (артериола); (arteriola, ағылш. ar— aya, terein — ішіндегі) — қызылтамырлар (артериялар) мен қылтамырларды (капиллярлар) жалғастырып тұратын жіңішке артерия қан тамыры. Қызылтамырша — микроойналым арнасының бастама қан тамырларына жатады. Жіңішке етті артериялар — қабықтары жұқарып, диаметрі тарылып, қызылтамыршаға айналады. Оның арнасының диаметрі 50-100 мкм. Олар тарамдалып, диаметрі жіңішкеріп, қабырғалары жұқарып қан капиллярларына ауысады. Қызылтамыршаның қабырғасы үш қабықтан құралған. Ішкі қабығы — интима өз кезегінде үш: эндотелий, эндотелийасты және ішкі эластинді жарғақ (мембрана) қабаттарынан тұрады. Ортаңғы қабығы - медианы 1-2 қабатта жатқан бірыңғай салалы ет ұлпасы миоциттері құрайды. Миоциттердің аралықтарында аздаған эластин талшықтары болады. Медиа мен адвентиция қабықтарының аралықтарында сыртқы эластинлі жарғақ болмайды. Сыртқы қабығы — адвентиция талшықты борпылдақ дөнекер ұлпасынан тұрады.