Сайқын жотасы

Сайқын жотасы — Жетісу Алатауының (Жоңғар) солтүстік-шығыс сілемінде орналасқан. Ендік бағытта 30 шақырымға созылып жатыр, ені 6 км шамасында. Абсолюттік биіктігі 2342 м. Палеозой жыныстарынан түзілген. Жотаның оңтүстік беткейі тік құлама, солтүстігі көлбеу, жайпақ. Солтүстік баурайынан бірнеше кішігірім өзендер басталады. Тау беткейлерінде бетеге, боз, айрауық, тобылғы өседі. Оңтүстік беткейі жақпартасты, өсімдік жамылғысы аз. Климаты қоңыржай белдеудің Тұран континенталдық белдеуіне жатады. Топырағы кәдімгі сұр топырақ. Сайқын жотасында жылан, кесіртке, тышқан, қоян, тасбақа, түлкі, т.б. кездеседі.