Қаған ең алдымен Чанъаньға елшілер жіберді, одан кейін Юкукқа шабуыл жасады. Юкук Байшуйху қамалынында қоршауда қалды. Көп ұзамай Юкук Тоқарстанға кетті. Ал Ілбіс Чанъаньға сый жіберіп, некелесу жайын сұрады. Император Тан еліне: Қотан, Қашғар, Чжуцзюйбо және Цун-лин қалаларын беруді талап етті. Қаған мұндай шарттан бас тартты.
646 жылы қаған Ашина Хелу көтеріліске шықты деп ойлап, оған қарсы қол аттандырды. Шығыс Түркістанда расымен де көтеріліс болған еді. Алайда көтеріліске Хелудің қатысы жоқ болатын. Хелу Тан еліне қашып кетті де, біраз уақыт Тан әскерінде қызмет етті. Ол түрік жасағына басшылық жасады. 649 жылы ол өз ордасын жиып, тан гвардиясынан ұлын алдыртып, қағанаттың шекарасына жақындады. Түріктердің көпшілігі Хэлуге қосылды. Ашина Хэлу шайқаста Ілбісті жеңіп, өлтірді.
