Мұқан Қонажанұлы

Қонажанұлы Мұқан (1862 - 1937) — жырау, ақын. 12 ата Байұлына жататын тана руының жиембет атасынан шыққан. Атақты Жиембет жыраудың ұрпағы. Қазан революциясына дейін қазіргі Жаңақала, Жалпақтал аудандары ізіндегі аумақты мекендеген орыс, қалмақ байларының жалшылығында болған. Кейінде жергілікті халықтың қалауына орай ел аралап, жыр толғап, ән айтумен Мұқан жырау атанған. Алпамыс, Ер Тарғын, Қобыланды, Шора, Қарасай-Қази, Орақ, Мамай, т.б. туралы батырлар жырын және Аралбай, Қашаған, Кердері Әубәкір, Махамбет өлендерін жатқа білген. Мұқанның ақындығы да болған. Ұлы Сағынғалиға қалдырған өсиеті мен нақыл шумақтары ел аузында сақталған («Мәдениет» газетінің 1993 жылғы 11 санында жарияланды). Мұқан бұрынғы И.Тайманұлы атындағы жылқы зауытына қарасты Қызылоба мекенінде жерленген.