Растошинское газ кен орны

Уикипедия — ашық энциклопедиясынан алынған мәлімет
Jump to navigation Jump to search

Растошинское газ кен орныКаспий маңы ойысының солтүстігіндегі газ кен орны. Батыс Қазақстан облысында, Орал қаласынан батыста 15 км жерде орналасқан. 1993 жылы белгілі болды. 1-ші іздестіру ұңғымасын сынамалау кезінде башқұрт жікқабаты шөгінділерінен газ ағымы (112 мың м3/тәу) алынды.

Геологиялық құрылымы[өңдеу]

Құрылым визе-башқұрт ернеулік кемерін күрделілендіретін болжамды органогендік горизонтпен байланысты. Өлшемдері 3,0x10,0 км, биіктігі 200 м-ге жуық. Төменгі башқұрт жікқабаты бөлігінің және Серпухов жікқабатының жоғарғы бөлігінің органогендік әктастары өнімді. Жинауыштары кеуекті, кеуекті-ұралы. Кеуектілігі 4,4-12% (орташа мәні 6,1%). Жапқыш қызметін қалыңдығы 6 м-ден ондаған метрге дейін жететін верей горизонтының аргиллиттері атқарады, тұрақты түрде көмкерген жағдайда күнгүр шөгінділері де жапқыш қызметін атқаруы мүмкін.

Жатыс сипаты[өңдеу]

Жатын шомбал бітімді. Шөгінділердің өнімділігі 4670 м-ден 4676 м-лік белгіге дейін анықталған, бұл өнімділік биіктігі 69 м. 6 мм-лік шайбада газ шығымы 119,3 мың м3/тәу-ті құрады. Бастапқы қойнауқаттық қысымы 54,9 МПа, температурасы 102°С.

Құрамы[өңдеу]

Газ негізінен метанды (89-95%), басқа түрбөлшектер, пайызбен(%): этан 0,6-4,1, пропан -0,04-0,06, бутан жене өзге гомологтар -0,02-ға дейін, күкіртсутек -2,85-3,56, көміртек диоксиді -3,4-4,03, азот -2,79-ға дейін болады. Башқұрт шөгінділеріндегі жатыннан басқа, кенорында 1-ші ұңғыма оқпанының 4218-4395 м аралығында ашылған калинов карбонатты горизонтының өнімділігі анықталды. Одан алынған газ ағымының шығымы 32,9 мың м3/тәу болды. 4760 м-лік белгіден темен алынған башқұрт жатынының табанасты суларының тығыздығы 1142 кг/м3, минералдылығы 207 г/л хлоркальцийді көлтұздықтар. 727 м-лік орташа динамикалық деңгейдегі су шығымы 30,4 м3/тәу-ті құрайды. Кен орнында жұмыс тоқтатылған.[1]

Дереккөздер[өңдеу]

  1. Қазақстанның мұнай энциклопедиясы. 2 томдық - Алматы: "Мұнайшы" Қоғамдық қоры, 2005. ISBN 9965-9765-1-1