Тұрғыт Сәдуақасұлы Османов

Османов Тұрғыт Сәдуақасұлы(1927 – 1982) – дирижер. Қазақстанның халық әртісі (1978).

Тұрғыт Османов 1952 жылы П.И.Чайковский атындағы Мәскеу консерваториясында дирижёр Ғазиз Дұғашевтің сыныбында, кейін 1953–1957 жылдары профессор Николай Аносовтың сыныбында опера және симфониялық дирижёрлік кафедрасында оқыды.

1957 жылдан 1974 жылға дейін Абай атындағы Қазақ мемлекеттік академиялық опера және балет театрында дирижёр болып жұмыс істеді.

А.Жұбанов пен Л.Хамидидің "Абай" (1958), М.Төлебаевтың "Біржан - Сара" мен "Амангелді" (Е.Г. Брусиловскиймен бірге), Брусиловскийдің "Қыз Жібек" (1959) пен "Жалбыр" (1960),Е.Рахмадиевтің "Қамарсұлу"(1965), Ғ.Жұбанованың "Еңлік - Кебек" (1975), А.П. Бородиннің "Князь Игорь" (1974), Дж. Вердидің "Аида" (1964) мен "Дон Карлосы" (1974), Ж.Бизенің "Кармен" 1964), т.б. операларына; В.В. Великановтың "Қамбар - Назым" (1959), А.И. Хачатурянның "Спартак" (1974) балеттеріне дирижерлік етті. Қазақ мемлекеттік симфониялық оркестрімен Мәскеу (1958), Ташкент (1962), Қазан (1967), Бішкек (1972), т.б. қалаларда өнер көрсетті.

1957 жылдан Алматы консерваториясында (қазіргі Қазақ ұлттық консерваториясы) педагогикалық қызметпен (1960 жылдан доцент) шұғылданды.