Қазақстан Республикасының Мемлекеттік хатшысы

Қазақстан Республикасының Мемлекеттік хатшысы - Қазақстан Республикасының Президенті қызметке тағайындайтын және қызметтен босататын Қазақстан Республикасының лауазымды тұлғасы.

Мемлекеттік хатшы өз қызметін Қазақстан Республикасы Президентінің тікелей басшылығымен жүзеге асырады, оған есеп береді және бақылауында болады.

Мемлекеттік хатшы қызметінің құқықтық негізін Қазақстан Республикасының Конституциясы, заңдары, Қазақстан Республикасы Президентінің өзге де актілері құрайды.

Мемлекеттік хатшы өкілеттігі

• Қазақстан Республикасының Президенті үшін ішкі және сыртқы саясаттың негізгі бағыттары бойынша ұсыныстар тұжырымдайды;
• Мемлекет басшысының тапсырмасы бойынша:

Қазақстан Республикасының Парламентімен және оның палаталарымен, басқа да мемлекеттік органдармен, саяси партиялармен және өзге де қоғамдық бірлестіктерімен қарым-қатынастарда;

халықаралық қатынастарда оның мүдделерін білдіреді;

Мемлекет басшысының жанындағы консультативтік-кеңесші органдардың:

• Адам құқықтары жөніндегі комиссияның,
• Сыбайлас жемқорлыққа қарсы күрес жөніндегі комиссияның,
• Мемлекеттік наградалар жөніндегі комиссияның,
• Қазақстан Республикасы Тұңғыш Президентінің Мемлекеттік бейбітшілік және прогресс сыйлығын беру жөніндегі комиссияның,
• Мемлекеттік рәміздер жөніндегі республикалық комиссияның,
• Мәдени және гуманитарлық салалардағы қайырымдылық және демеушілік қызметі үшін Қазақстан Республикасы Президентінің Құрмет дипломын беру жөніндегі комиссияның;
• Қазақстан халқы ассамблеясының қызметін үйлестіреді;

• Қазақстан Республикасында қоса атқарушы ретінде тіркелген шет мемлекеттердің елшілерінен сенім грамоталарын қабылдайды;
• Қазақстан Республикасының Президентінің тапсырмаларына сәйкес өзге де өкілеттіктерді жүзеге асырады.

Өкілеттігін іске асыру

• өкімдер шығаруға;
• орталық және жергілікті атқарушы органдарға тапсырмалар беруге;
• Қазақстан Республикасының Парламенті мен оның палаталарының, Үкіметінің, Мемлекет басшысының жанындағы консультативтік-кеңесші органдардың отырыстарына қатысуға;
• өз құзыретіне жататын мәселер бойынша мемлекеттік органдар мен лауазымды тұлғалардан қажетті ақпаратты, құжаттар мен басқа да материалдарды сұратуға және алуға;
• өзінің құзыретіне кіретін мәселелер бойынша Қазақстан Республикасы Президенті актілерінің жобаларын әзірлеу, сондай-ақ Мемлекет басшысы алға қойған өзге де міндеттерді шешу үшін ведомствоаралық жұмыс топтарын құруға құқылы.

Мемлекеттік хатшының қызметін ұйымдық-құқықтық, ақпараттық-талдау және өзгедей қамтамасыз етуді Қазақстан Республикасы Президентінің Әкімшілігі жүзеге асырады.

Мемлекеттік хатшылар

№	Мемлекеттік хатшы		Басқара бастады	Басқаруын аяқтады
1		Ахметжан Есімов	4 наурыз 1996	24 қазан 1996
2		Әбіш Кекілбайұлы	30 қазан 1996	29 қаңтар 2002
3		Қасым-Жомарт Тоқаев	29 қаңтар 2002	13 маусым 2003
4		Иманғали Тасмағамбетов	13 маусым 2003	9 наурыз 2004
5		Оралбай Әбдікәрімов	10 наурыз 2004	15 мамыр 2007
6		Қанат Саудабаев	15 мамыр 2007	23 қаңтар 2012
7		Мұхтар Құл-Мұхаммед	23 қаңтар 2012	16 қаңтар 2013
8		Марат Тәжин	16 қаңтар 2013	21 қаңтар 2014
		Кәрім Мәсімов	21 қаңтар 2014	2 сәуір 2014
9		Әділбек Жақсыбеков	2 сәуір 2014	22 қазан 2014
		Нұрлан Нығматулин	22 қазан 2014	11 қараша 2014
10		Гүлшара Әбдіқалықова	11 қараша 2014	25 ақпан 2019
11		Бақытжан Сағынтаев	1 наурыз 2019	24 наурыз 2019
12		Марат Тәжин	24 наурыз 2019	18 қыркүйек 2019
13		Қырымбек Көшербаев	18 қыркүйек 2019	5 қаңтар 2022
14		Ерлан Қарин	5 қаңтар 2022	қазіргі күні

Cілтеме

• Қазақстан Республикасы Мемлекеттік хатшысының мәртебесі мен өкілеттіктері туралы ҚАЗАҚСТАН РЕСПУБЛИКАСЫ ПРЕЗИДЕНТІНІҢ ЖАРЛЫҒЫ, 2007 жылғы 13 тамыз N 379

Дереккөздер

• http://www.akorda.kz/kz/secretary_of_state/on_the_status_and_authorities_of_secretary_of_state/decree_of_the_president_of_the_republic_of_kazakhstan Мұрағатталған 24 маусымның 2010 жылы.