Құлбек Жұмабаев

Құлбек Жұмабаев (1.6. 1898, Бәйдібек ауданы Досан-Қарабас ауылы – 21.3.1976, сонда) – құрметті теміржолшы, осы өңірге аты мәлім Досай бидің ұрпағы. Жұмабаев кезінде осы өңірден шыққан алғашқы ағартушылардың бірі ретінде Бестоғай, Досан, Жетімтау, Шақпақ елді мекендерінен мектеп ашып, балаларды оқытқан. Шымкент қаласында мұғалімдер курсын бітіріп, кейін Қазақ педагогикалық институтында, жоғары партия мектебінде білімін жетілдірген. 1928 – 55 жылдары Шәуілдір ауданы газетінің бас редакторы, мектеп директоры, ауданы атқару комитетініңтөрағасы, т.б. жауапты қызметтер атқарған. «Оңтүстік Қазақстан» газетінде, республикалық «Білім және еңбек» журналында, т.б. басылымдарда қоғамның көкейкесті мәселелеріне арналған танымдық мәні бар мақалалары жарық көрген. 1940 жылдардың екінші жартысында Қазақстан Үкіметінің арнайы тапсыруымен осы ауданнан үлкен құрылысшылар жасағын құрып, бүкілхалықтық Мойынты-Шу теміржол құрылысына белсене қатысқан. Мойынты-Шу теміржолын салуда және пайдалануға беруде айрықша еңбек сіңіріп, Үкімет тапсырмасын орындағаны үшін Қазақ КСР Жоғарғы Кеңесі Президиумының грамоталарымен (1947, 1953), КСРО Жол қатынастары министрлігінің Құрмет белгісімен және грамотасымен марапатталған.