Бандунг конференциясы

Бандунг Конференциясы, Үндістан, Индонезия, Пәкстан, Бирма (Мьянма), Шри Ланка басшыларының ұсынысымен 1955 жылы 18 — 24 сәуірде Бандунгте (Индонезия) өткен Азия мен Африка елдерінің форумы. Аталмыш мемлекеттерден басқа Бандунг Конференциясына Алтын Жаға, Ауғанстан, ВДР, Жапония, Египет, Ирак, Иран, Иордания, Йемен, Камбоджа, ҚХР, Лаос, Либерия, Ливан, Ливия, Непал, Оңтүстік Вьетнам, Сауд Арабиясы, Сирия, Судан, Тайланд, Түркия, Филиппин, Эфиопия және бейресми түрде Алжир, Марокко, Тунис, Оңтүстік Африка Одағы өкілдері қатысты. Алғаш рет екі құрлықтағы тәуелсіз мемлекеттер өздеріне тікелей байланысты мәселелерді талқылап, тиісті шешімдер қабылдады. Конференция барлық елдерді соғысқа жол бермеуге, ядролық қаруды жоюға, мемлекеттер арасындағы қатынастарды панча шила принциптеріне сүйене отырып дамытуға және ынтымақтасуға шақырды. Отаршылдықты түбірімен жою жөніндегі пікірталаста Түркия, Пәкстан, Филиппин өкілдері тарапынан Кеңес Одағындағы одақтас республикалар (Украина, Орталық Азия,Балтық елдері) тағдырына назар аударылды. Индонезия президенті Сукарноның “қандай түрде болсын, отаршылдық — масқара, оның көзін құрту қажет” деген пікірі Бандунг Конференциясы шешімдеріне енді. Бандунг Конференциясында жаңадан пайда болған дамушы елдердің өз тағдырын өзі шешуге құқылы екендігі әлемге жария етілді, Азия және Африка халықтарының экон. және мәдени дамуы жолдары белгіленді. Конференция отаршылдыққа қарсы күресте және бейбітшілікті нығайтуда оң рөл атқарды. ^[1]