Картоп нематоды

Картоп нематоды, гетеродера (лат. Heterodera rostochiensis) - жұмыр құрттар класына жататын паразит құрт. Ұрғашысы алғашқыда ақ, кейін сарғылт және одан кейін қоңыр түсті болады. Қыстайтын ұрғашысы - циста, домалақ пішінді (диаметрі 1 мм-ге дейін). Еркегінің ұзындығы 1,2 мм, пішіні құрт тәрізді, мөлдір түсті. Картоп нематоды Венгрия, Румыния, Болгария және Албаниядан басқа Еуропа елдерінде, Алжир, Израиль, Үндістан, Жапония, Австралия, Канада, АҚШ, Мексика, Боливия, Перуде тараған. КСРО кезінде алғаш рет 1948 жылы белгілі болды. Бұның ошағы Латвия, Литва, Эстония, Белоруссия және Украинада кездеседі. Картоп нематоды картоптың тамырында, сирек те болса түйнегінде, қызанақ т.б. алқа тұқымдас өсімдіктерде тіршілік етеді. Картоп нематоды картоптың дамуын аса тежейді, өнімін азайтады, кейде өсімдік солып қалады. Картоп нематоды болмау үшін зақымданбаған және оған төзімді картоп сорттары егіледі. Ауру шыққан жерге 4 жыл картоп нематодына төзімді дақылдар егіледі, кейін немотоцид дәрілерімен өңделген соң картоп егуге болады:картоп нематоды ошағын жоюға хлорпикрин қолданылдаы, шаруашылыққа карантин салынады.