Салтанат (би ансамблі)
Басқа мағыналар үшін Салтанат деген бетті қараңыз.«Салтанат» — Қазақстан Республикасының мемлекеттік би ансамблі, Қазақстанның еңбек сіңірген өнер ұжымы (1967). 1955 жылдан Қазақтың мемлекеттік ән-би ансамблінің негізінде ұйымдастырылып, 1989 жылдан «Салтанат» би ансамблі болып қайта құрылған.
1996 жылдан ансамбльдің көркемдік жетекшісі әрі бас балетмейстері Қазақстанның еңбек сіңірген өнер қайраткері Гүлсәуле Орымбаева. «Салтанат» өнерпаздары қазақ билері, классикалық, басқа да ұлттардың би техникасын жетік игерген. Оның репертуарында 70-ке жуық би қойылымдары бар. «Салтанат» би ансамблінің концерттік бағдарламасын республиканың түкпір-түкпірінде, сондай-ақ шетел (АҚШ, Ұлыбритания, Франция, Болгария, Италия, Түркия, Қытай, Ресей және тағы басқа) көрермендері тамашалаған. 1998 жылы Пусан қаласында (Оңтүстік Корея) өткен 19 елдің өнерпаздары қатысқан дүниежүзілік би фестивалінде «Салтанат» ансамблі лауреат атанды. «Салтанат» ансамблінің құрамында Б. Бектаев, Т. Потапова, Э. Дәрменова, А. Омарова, М. Мельник, «Алматы-2000» фестивалінің «Гранд при» жүлдесінің иегері А. Нұрбабанова, Шара Жиенқұлова атындағы республикалық конкурстың лауреаты А. Есекеев, Қазақстанның еңбек сіңірген мәдениет қызметкері Рамазан Бапов, Қазақстанның еңбек сіңірген өнер қайраткері Н. Ножкин сынды би өнерінің шеберлері бар.[1][2]
Тарихы[өңдеу | қайнарын өңдеу]
Қазақ КСР халық әртісі, Украина КСР еңбегі сіңген әртісі Лидия Чернышева басшылығымен ең алғаш 1955 жылы Қазақ КСР ән-би ансамблі ашылды. Ұжым Алматы және Киев консерваторияларының, Ленинград және Алматы музыкалық училищелерінің жас түлектерінен құрылды.
Мәскеу қаласында өткен студенттер мен жастардың Дүниежүзілік фестивалінің жеңімпазы және Дүниежүзілік фестивалінің лауреаты атанған «Салтанат» ән-би ансамблі бүкіл Кеңес Одағына концерт беріп, әлемнің көптеген елінде гастрольдік сапарға шықты.
1989 жылы Қазақ КСР Министрлер Кеңесінің Қаулысымен Қазақ КСР ән және би ансамблі «ҚР «Салтанат» мемлекеттік би ансамблі» болып қайта құрылды.
Көркемдік жетекшілері[өңдеу | қайнарын өңдеу]
- Лидия Чернышева
- Шара Жиенқұлова
- Е. Усин
- А. Бекбосынова
- Зәуірбек Райбаев
- Гүлсәуле Орымбаева
- Қуанышбек Төлеген
Дереккөздер[өңдеу | қайнарын өңдеу]
- ↑ Қазақ энциклопедиясы, 7 - том
- ↑ Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8