Қансу мұнай-газ кен орны

Уикипедия — ашық энциклопедиясынан алынған мәлімет
Jump to navigation Jump to search

Қансу мұнай-газ кен орныОңтүстік Маңғыстау ойысымының Қарынжарық ер тұрқылас құрылымындағы мұнай-газ кен орны. Маңғыстау облысында, Жаңаөзен қаласынан оңтүстік-шығыста 135 км жерде орналасқан. Кен орны 1970 жылы ашылған.

Геологиялық құрылымы[өңдеу]

Кен орны ендікке жуық бағытта созылған брахиантиклин қатпардан орын алған. Газ жатындары ортаңғы юра мен төменгі бор (апт және альб жікқабаттары) және жоғарғы бор (сеноман жікқабаты) шөгінділерінде белгілі болды. Ортаңғы юра шегінділерінің жатындары өлшемдері мен қорлары жөнінен өте шағын және зерттелмеген. Төменгі және жоғарғы бор жатындары орталық және шығыс тектоникалық блоктардан орын алған және бес қойнауқаттан тұрады.

Жатыс сипаты[өңдеу]

Табиғи қорқоймасының сипаты жөнінен жатындар қойнауқаттық күмбездік, тектоникалық тұрғыдан қалқаланған және қойнауқаттық, литологиялық тұрғыдан қалқаланған жатындар да ұшырасады. Өнімді қойнауқаттардың жинауыштары кеуекті, ашық кеуектілігі 23-25%, өтімділігі 0,09-0,97 мкм 2. Жинауыш қойнауқаттың тиімді қалыңдығы 2,4-45 м-ге, газға қаныққан қалыңдығы 1,3-6,4 м-не дейін жетеді. Газға қанығу коэффициенті 0,32-0,55. Бастапқы қойнауқаттың қысымдар 5,7-14,3 МПа, қойнауқат температурасы 33-63°С болды. Мұнай шығымы жатындар мен блоктар бойынша 29-173 мың м3/тәу-ке дейін өзгереді.

Құрамы[өңдеу]

Газдарда 74-89% метан бар, ауыр көмірсутектердің үлесі 5,5-8,3%-ды құрайды, гелийі 0,065%, көмірқышқыл газы 0,4%. Альб жатының газы құрамы жөнінен ауыр, этанұстаушы, ауыр көмірсутектер үлесі 12,3%-ға жетеді. Хлоркальцийлі типті қойнауқаттық судың тығыздығы 1060-1090 кг/м3, минералдылығы 37-40 г/л, құрамында йод, бром, бор бар. Кен орнында жұмыс 1973 жылдан бері тоқтатылған.[1]

Дереккөздер[өңдеу]

  1. Қазақстанның мұнай энциклопедиясы. 2 томдық - Алматы: "Мұнайшы" Қоғамдық қоры, 2005. ISBN 9965-9765-1-1