Макинск – Қазақстандағы қала (1945 жылға дейін Макинка жұмысшылар кенті), Бұланды ауданының әкімшілік орталығы (1957). Астана қаласынан солтүстікке қарай 180 км жерде орналасқан. Іргесі 1914 жылы қаланған, 1945 жылы қала мәртебесі берілді. Тұрғыны 17,8 мың адам (2008). 1942 жылы Тамбов облысы Мичуринск қаласындағы поршеньді сақина жасау зауытының көшіп келуіне байланысты Макинск қаласының өнеркәсібі дами бастады. Кейіннен металл жасау зауыты, бейкентас құрылыс материалдарын шығаратын кәсіпорын, құрылыс және құрастырушы материалдар комбинаты, ағаш өңдеу зауыты, элеватор, нан пісіретін зауыт іске қосылды. Қалада “Степгеология”, “Поршенькомплект”, “Бұланды карьері”, “Макинск элеваторы”, “Прогресс”, “Агротехсервис”, “Макинск мұнайбазасы” акционерлік қоғамы, 5 жалпы білім беретін мектеп, музыка, спорт мектептері, 3 аурухана, емхана, дәріхана, санитарлы-эпидемиологиялық станциясы, 2 мәдениет үйі, 3 клуб, 2 кинотеатр, 6 кітапхана, балалардың шығармашылық үйі, баспахана, 3 автокәсіпорын, автоматты телефон станциясы бар. Сауда торабы және қоғамдық тамақтану орындарынан 32 дүкен, 7 асхана жұмыс істейді.Қалада 2-дүниежүзілік соғыста қаза болғандарға және Кеңес Одағының батырлары М.Ягминскийге, И.Олиговқа, И.Скуридинге обелиск орнатылған. Қала арқылы Астана – Көкшетау автомобиль жолы, Степногорск – Атбасар темір жол өтеді.
[өңдеу] Пайдаланылған әдебиет
Қазақ энциклопедиясы
[өңдеу] Түсініктемелер
Қазақстан қалалары
