Василий Васильевич Смыслов

Смыслов сол жақта

Василий Васильевич Смыслов (24.3.1921, Ресей, Мәскеу — 27.3.2010, сонда) — шахматтган дүние жүзінің жетінші чемпионы (1957 — 58), халықаралық дәрежедегі гроссмейстер (1950). КСРО-ның еңбек сіңірген спорт шебері (1948), шахмат композициясынан халықар. дәрежедегі төреші (1957). Шахмат ойнауды алты жасында әкесі В.О. Смысловтан үйренген. Мәскеу қаласының чемпионы (1942, 1943), 1944 ж. М.Михаил Моисеевич Ботвинникпен 1-2-орынды бөлісті. КСРО чемпионы (1949), күміс (1944, 1955), қола жүлдегері (1947, 1969, 1971). 1948 ж. әлем чемпионы атағы үшін өткен турнирде 2-орын алды. 1953, 1956 ж. әлем чемпиондығынан үміткерлер турнирлерін ұтты. 1954 ж. әлем чемпионы Михаил Моисеевич Ботвинникпен тең түсті. 1957 ж. Михаил Моисеевич Ботвинникті 12,5:9,5 (+6, –3, =13) есебімен ұтып, әлем чемпионы атанды. Бірақ 1958 ж. қарымта қайтару кездесуінде 10,5:12,5 (–5, +7, =11) есебімен ұтылып қалды. 1984 ж. финалдық бәсекеде Г.Каспаровқа —4,5:8,5 есебімен ұтылды. КСРО құрамасы сапында Бүкіләлемдік шахмат олимпиясында 10 рет (1952 — 54, 1968 — 74), Еуропаның командалық чемпионатында бес рет (1957 — 73), әлемнің командалық чемпионатында (1985) жеңіске жетті. 73 халықар. турнирге қатысып, 20 мәрте жеңімпаз және 42 рет жүлдегер атанған. Ол көптеген кітаптардың авторы. Шахмат теориясы бойынша испан партиясы, славян қорғанысы, ферзь гамбиті дебюттерінің дамуына үлес қосты, Грюнфельд қорғанысында жаңа жүйені талдап шығарды.