Үйде жалғыз қалғанда

Үйде жалғыз қалғанда
Home Alone
Жанры	жаңа жылдық комедия
Режиссёрі	Крис Коламбус
Продюсері	Джон Хьюз
Сценарийдің авторы	Джон Хьюз
Басты рөлдерде	Джо Пеши Дэниел Стерн Маколей Калкин
Операторы	Хулио Макат
Композиторы	Джон Уильямс
Кинокомпания	Түсірген: Hughes Entertainment Дистрибьютор: 20th Century Studios
Ұзақтығы	103 мин.
Бюджеті	$18 000 000
Кассалық түсімі	$476 684 675
Мемлекет	АҚШ
Тілі	ағылшын тілі
Шыққан жылы	1990 жыл
Келесі фильм	Үйде жалғыз қалғанда 2: Нью-Йоркте жоғалған
IMDb	ID 0099785

Үйде жалғыз қалғанда (ағылш. Home Alone) — 1990 жылы Джон Хьюздың сценариі бойынша түсірілген америкалық жаңа жылдық комедия. Режиссері - Крис Коламбус. Маколей Калкин фильмде Кевин Маккаллистердің рөлін сомдады. Кевиннің отбасы Парижге жаңа жылдық демалысқа ұшып кетіп, оны үйде қалай жалғыз қалдырып кеткендерін байқамай қалады. Алғашында Кевин үйдегі жалғыздықтан рақаттанады, бірақ кейіннен екі қарақшыға тап болады. Қарақшылар рөлдерін Джо Пеши мен Дэниел Стерн орындады. Сондай-ақ картинаға Джон Херд, Кэтрин О’Хара және тағы басқа актерлар қатысты.

Сыншылар фильм жайлы әртүрлі пікір білдірді. Фильм Солтүстік Америкада шыққан жаңа жылдық комедиялар арасында ең көп кассалық табысқа ие болды. Сонымен қатар фильм АҚШ кинематографиясының тарихындағы ең көп кассалық табысқа ие болған комедия ретінде рекорд орнатқан. Бұл рекорд 2011 жылы «Бас жазу: II-ші бөлім» кинофильмі шыққанға дейін ұсталып тұрған. Картина төрт сиквелдан тұратын франшизаның негізі болды, олардың екеуі ғана тікелей жалғасы болып саналады. Дегенмен «Үйде жалғыз қалғанда 2: Нью-Йоркте жоғалған» фильмінде ғана толықтай бұрынғы актерлық ұжым сақталды. Ал қалған екі сиквел толықтай дербес болып есептеледі.

1991 жылы фильм «Фильмдегі үздік ән» («Somewhere in my Memory» композициясы) және «Фильмдегі үздік музыка» номинацияларында «Оскар» сыйлығына ұсынылды. «Somewhere in my Memory» композициясы «Визуалды медиадағы үздік ән» номинациясы бойынша «Грэмми» сыйлығына ұсынылды, алайда жеңіске жетпеді. Басты рөлді орындаушы Маколей Калкин «Комедия немесе мюзиклдегі үздік ер адам рөлі» номинациясында «Алтын глобус» сыйлығына ұсынылды.

Сюжет

Фильмдегі оқиға желтоқсан айында орын алған. Маккалистерлер отбасы Чикагоның шет аймағында орналасқан Питер мен Кейттің үйіне жиналады. Сол жерден барлығы бірігіп қыстық демалыстарын өткізу үшін Парижге ұшпақ болады. Үй иелерінің ұлы, сегіз жасар Кевинді туған бауыр-қарындастарымен басқа да өзі құралпылас туысқандары мазақ қылады. Кевин мен оның үлкен ағасы Базз өзара араздасып қалады. Кевинді жазалау мақсатында шатырдағы қабатқа ұйықтауға жібереді. Ыза болған Кевин отбасының жоқ болып кеткенін тілейді. Сол түні қатты жел соғып электр желілері зақымданады, сондықтан оятқыш сағаттағы уақыт артқа қалып қояды. Ертесінде асыққан отбасы, шатырдағы қабатта ұйықтап жатқан Кевинді ұмыт қалдырады. Кевин үйде жалғыз қалды.

Ояна салысымен Кевин үйде жалғыз қалғанын түсініп, тілегі орындалғанына қуанады. Әйтсе де көп кешікпей оның көңіл-күйі күрт бұзылады: көрші қарт Марлиді кездестірген балақайдың зәресі ұшады. Кевиннің естуі бойынша қарт Марли 1958 жылы өз отбасын қар күрейтін күрекпен өлтірген. Кейінірек Кевин тағы да басқа қатермен жолығады. Ол өз маңайындағы демалыс кезінде босап тұрған үйлерге ұрлықпен түсіп жүрген екі қарақшыны кездестіріп қалады. Өздерін «дымқыл қарақшылар» деп атайтын Гарри мен Марвтың көздері Маккаллистерлердің үйіне түскен. Оны білген Кевин әртүрлі қулықтар арқылы қарақшыларға өзінің үйде жалғыз қалғанын білдіртпеуге тырысады.

Парижге ұшып бара жатқан Кейт ұлын үйде жалғыз қалдырып қойғанына көзі жетеді. Анасы тезірек үйіне қайтпақшы болады, бірақ келесі екі күнге Чикагоға дейін билеттер жоқ болып шығады. Питер және отбасының басқа да мүшелері оның ағасы Робтың париждік пәтеріне жол тартады. Ал Кейт болса қайта АҚШ-қа ұшып кетеді, бірақ Чикагоға емес, Пенсильвания штатындағы Скрантон қалашығына. Ол жерге жеткенде Кейт Чикагоға дейін ұша алмайтындығын біліп, жеңіл көліктегі полька орындайтын музыкалық тобымен бірге жол тартуға шешім қабылдайды. Ал ол уақытта Гарри мен Марв Кевинның расымен де үйде жалғыз қалғанына көздері жетеді. Алдыңғы түнде Маккаллистерлердің үйіне түспек болған олар, Кевиннің олардың жоспарын естіп қалғанын байқамай қалған.

Рождество күнінің дәл қарсаңында Кевин шіркеуге балалар хорын тыңдауға барады. Шіркеуде Кевиннің жанына қарт Марли келіп отырады. Онымен сөйлескен Кевин, Марли жайлы естіген сыбыстары өтірік екенін біліп, ол жайлы қателескеніне көзі жетеді. Марли шіркеуге хорда ән салатын немересін тыңдауға келгенін, оны шіркеуден тыс жерде көре алмайтынын айтады. Себебі ол кезінде ұлымен қатты ұрсысып, көп уақыт бойы бір-бірімен араласпаған. Кевин Марлиге ұлымен қайта татуласып көруге ұсыныс жасайды.

Шіркеуден үйіне қайтқан Кевин ұрыларды жақсылап күтіп алуға дайындалмақ болған. Ол үйдің әртүрлі жерлеріне кішігірім тұзақтар орнатады. Үйге кірмекші болған Гарри мен Марв Кевин ұйымдастырған кедергілерге тап болып, түрлі жарақаттар алады. Ұрылар Кевинді бүкіл үйді айналып қуғанда, ол полицияға қоңырау шалып көршінің үйіне қашып үлгереді. Әйтсе де Кевин Гарри мен Марвтың қолдарына түсіп қалады. Олар қалай қу балақайдан өштерін алатынын ақылдасып жатқанда, арттарынан Марли келіп күрекпен ұрып талдырады. Келіп жеткен полиция қызметкерлері «дымқыл қарақшыларды» дереу тұтқынға алады. Маңайдағы тоналған үйлерді су басып кеткендіктен, олардың бәрі екі алаяқтың істері екеніне тікелей дәлел болады. Тоналған үйден кетпек бұрын Марв ылғи да су құбырының шүмегін ашық тастап кететін.

Рождество күнінің таңертеңінде оянған Кевин өзін көңілді сезінеді, өйткені оның отбасы әлі де үйге қайтып келмеген. Сол сәтте ол кіреберіс есіктің ашылғанын естиді. Үйге кіріп келген Кейт Кевинді шақырады. Кевин анасына қарай түсіп, онымен қауышады. Дәл сол уақытта оларға бірінші пайда болған мүмкіндікпен үйлеріне қайтқан қалған Маккаллистерлер қосылады. Ұрылармен болған оқиғаны Кевин отбасындағы ешкімге айтпады. Кейіннен Кевин терезеден Марлидың өз ұлымен және оның отбасымен татуласқанын көреді. Марли да Кевинді байқап қалады – бір-біріне қол бұлғаған олар, әр қайсысы өз отбасына оралады.

Басты рөлдерде

Маколей Калкин – Кевин Маккалистер Джо Пеши – Гарри Лайм, қарақшы Дэниел Стерн – Марвин Мерчантс, Гарридің сыбайласы Кэтрин О’Хара – Кейт Маккаллистер, Кевиннің анасы Джон Херд – Питер Маккаллистер, Кевиннің әкесі Джерри Бэммен – Фрэнк Маккаллистер, Питердың ағасы Терри Снелл – Лесли Маккаллистер, Фрэнктың жұбайы

Девин Рэтрей – Базз Маккалистер Киран Калкин – Фуллер Маккалистер Майк Маронна – Джефф Маккалистер Хиллари Вульф – Меган Маккалистер Анджела Геталс – Линни Маккалистер Джедидайя Коэн – Род Маккалистер Сента Моузес – Трейси Маккалистер Дайана Кампеану – Сондра Маккалистер Анна Слотки – Брук Маккалистер Кристин Минтер – Хэзер Маккалистер

Робертс Блоссом – Марли қарт Джон Кэнди – Гас Полински, "Орта Батыстағы полька патшасы" Ральф Фуди – Снейкс, «Лас жанды періштелер» фильміндегі гангстер Ларри Хэнкин – офицер Ларри Бальзак Кен Хадсон Кэмпбелл – Санта–Клаус боп киінген ер адам Хоуп Дэвис – Париж–Орли әуежайындағы администратор

Басты рөлдерді орындаушылар (оннаң солға қарай): Маколей Калкин, Джо Пеши, Дэниел Стерн, Кэтрин О’Хара, Джон Херд және Джон Кэнди

Өндіріс

Фильмдегі үйдің рөлін атқарған жекежай Иллинойс штатындағы Уиннетка қалашығында орналасқан.

1988 жылдың аяғында Джон Хьюз «Жаңа жылдық демалыс» атты фильмнің сценариін агенті Джек Рапки арқылы Крис Коламбус жібереді. Хьюз Коламбустың жаңа жылдық фильмдерге деген жылы қөзқарасы жайлы біліп, оған фильмді түсіруге ұсыныс жасайды. Коламбус пен Хьюз алдын ала келісімге келеді. Дегенмен Коламбуспен басты рөлді орындайтын Чеви Чейзбен болған түсініспеушіліктен кейін, режиссерлік орнынан бас тартады.

1989 жылы Джон Хьюз өзінің сценарийі бойынша «Бак ағатай» атты фильмін түсірумен айналысады. Бұл фильмде Маколей Калкин екінші қатарлы рөлде ойнады. Коламбус «Жаңа жылдық демалысты» түсіруден бас тартқаннан үш ай өткен соң, Хьюз оған тағы да екі фильмнің сценариін ұсынады. Хьюз «Шегіне жеткенде» мен «Үйде жалғыз қалғанда» атты сценарийлер жазған болатын. Бұл сценарийлерді Коламбустан басқа Патрик Рид Джонсонға да ұсынады. Джонсон екі сценарийден де бас тартады, Коламбус болса «Үйде жалғыз қалғанда»-ны түсіруге келісімін береді. Басында фильм Warner Brothers студиясында түсірілуі керек болатын. «Үйде жалғыз қалғанда» фильмінің түсірілімі 1989 жылдың ақпан айында басталуы керек болатын. Бірақ Warner Brothers шығармашылық бюджетін екі есе көтеруге келіспей, фильмнен бас тартады (бастапқы бюджет 10 миллион долларды құраған). Жаңа демеушілер іздеген Хьюз 20th Century Fox директорлар кеңесінің төрағасы Джо Рот арқылы студияға фильмді ұсынады. 20th Century Studios келісімін беріп, 18 миллион долларды құрайтын бюджетті бөледі.

«Үйде жалғыз қалғанда» франшизасының алғашқы екі фильмінің режиссері Крис Коламбус.

Хьюз Коламбусқа басты рөлге Маколей Калкинды алуға кеңес береді. Дегенмен Коламбус Кевиннің рөліне үлкен кастинг жариялайды. Ол Калкинның кандидатурасына тоқтамай тұрып, жүздеген балаларды қарап шығады (олардың ішінде Джеффри Уайзман да болған, кейіннен балаларды санағанда Кевинмен шатастырылып қалатын көрші бала Митч Мерфидің эпизодтық рөлін ойнады). Жасына байланысты Калкин тек қана кешкі сағат онға дейін ғана түсе алған. Бұл түсірілім ұжымына біршама қиындықтар әкелді, өйткені фильм көп жағдайда түн кезіндегі оқиғаларды көрсету керек болатын. Кевиннің орнына трюктарды орындайтын каскадерлермен жұмыс та ұжымға қиын тиген. Коламбустың айтуы бойынша: «Каскадер балалар трюктарды орындаған кезінде мүлде күлкіге деген орын болмады. Балақайлардың қауіпті трюктарына қарап, мен олардың аман-есендіктерін ғана тілейтінмін». Алғашында трюктер түгелдей қауіпсіздік белдіктерін қолдана орындалатын. Бірақ камерада тым көзге түскендіктен белдіктерден бас тартуға тура келді. Коламбус интервьюлердің бірінде Джо Пеши жайлы айта отырып: «"Жөнді жігіттер" фильміндегі Джоның кейіпкері әрдайым менің күлкімді келтіретін. Джо - қандай жағдай болса да комедияға жөнді орын таба білетін актерлардың бірі деп ойлаймын. Ол біздің фильмге расымен де өте қатты қатысқысы келген». Пеши орындауындағы Гарри Лайм есімді қарақшының аты Кэрол Ридтың «Үшінші адам» фильмінен алынды (бұл фильмде дәл сондай атты кейіпкерді Орсон Уэллс ойнаған). Коламбус кейіннен айтқанда: «Джо – біздің заманымыздың ең мінезді актерларының бірі, ол біздің жетекші кейіпкеріміз болды. Джо Гарриді диккенс типті кейіпкер ретінде көрсеткісі келген. Ол кейіпкерін саусақтары кесілген қолғап киетін, қысқа шашты болғанын қалады. Екі шетке шайқала жүруді де өзі ойлап тапты. Бұған қоса ол әрбір екі сөздің арасында "Fuck" тәріздес дыбыстарды қосатын, бірақ кейіннен одан бас тарты. Отбасылық фильм түсіретін болғандықтан, Джоға оны "Fridge" сөзімен алмастыруға кеңес бердім».

Маккалистерлердің үйінің ішкі көріністерін түсіру үшін қолданылған үш қабатты жекежай Иллинойс штатындағы Уиннетка қалашығында Линкольн-Авеню, 671 мекенжайы бойынша орналасқан. Үй 1920 жылы салынған. Жекежай 1988 жылдың 15 желтоқсанында сатып алған отбасының иелігінде болған. Түсірілім кезінде олар үйде тұра беруді жалғастырған. Ішкі көріністер үшін бұл үйдегі ас үй, жертөле, алдыңғы зал мен бірінші қабаттың үлкен бөлігі қолданылды. Қалған интерьер (ас бөлмесі, екінші және шатырдағы қабат) толықтай декорацияда түсірілді. Үйде 5 жатын бөлме, толықтай ауыстырылған шатырдағы қабат, жылыжай мен қосарлы гараж бар. Үйдің артқы ауласындағы ағаштағы үйшік фильм үшін арнайы тұрғызылып, түсірілім біткенде қайта бұзылды. 2011 жылдың мамыр айында жекежай 2,4 миллион долларға сатылымға қойылып, 2012 жылдың наурыз айында 1,585 миллион долларға сатылды. Назар аударуға тұрарлық туристік нысан ретінде жарнамаланып, «үйіңіздің кинода көрініп қалуына қалай қол жеткізуге болады» деген үлгі ретінде келтіріледі.

Шіркеу ретінде Иллинойс штатының Ок-Парк қаласындағы Грейс епископалды шіркеуі түсірілді. Бірақ шіркеудің ішкі көріністері Хэвен-Миддл мектебінде түсірілген. «Лас жанды періштелер» атты фильмдегі фильмді түсіргенге бір күн ғана уақыт жұмсалды. 1940-шы жылдардағы гангстерлік кинобейнелеріне ұқсас болу үшін ақ-қара түсті бейнекамера мен сол заманның бұйымдары қолданылды. Париж-Орли әуежайындағы көріністер О‘Хара халықаралық әуежайінің бір бөлігінде түсірілді.

Саундтрек

Home Alone: Original Motion Picture Soundtrack
Джон Уильямс Саундтрек
Шыққан жылы	4 желтоқсан 1990 (Кассета) 27 мамыр 2015 (CD)
Жанры	Классикалық музыка
Ұзақтығы	56:58
Ел	АҚШ
Лейблі	Sony Classical
Кәсіби пікірлер
AllMusic
Джон Уильямс хронологиясы
Stanley & Iris: Original Motion Picture Soundtrack (1990) Home Alone: Original Motion Picture Soundtrack (1990) Hook: Original Motion Picture Soundtrack (1991)

Home Alone: Original Motion Picture Soundtrack —«Үйде жалғыз қалғанда» кинобейнесінің саундтрегі. Альбомдағы композицияларды Джон Уильямс жазған. Sony Classical лейблінде 1990 жылдың 4 желтоқсанында Кассета форматында шығарылған. 2015 жылдың 27 мамырында Sony Masterworks лейблінде компакт-диск форматында қайта шықты.

Бастапқыда фильмнің режиссері Крис Коламбус саундтрекке деген музыканы Брюс Бротонға жаздырмақшы болған. Фильмнің алғашқы постерларында Бротон композитор ретінде көрсетілген. «Австралиялық құтқарушылар» атты толық метражды мультфильмінің музыкасын жазумен айналысқан Бротон, Коламбустың ұсынысынан соңғы сәтте бас тартады. Сол себепті Коламбус Стивен Спилбергтің көмегімен Джон Уильямспен келісімшартқа отырады. Фильмде «O Holy Night» және «Carol of the Bells» сынды дәстүрлі әндер орындалады. Саундтрек «Фильмдегі үздік музыка» номинациясында «Оскар» сыйлығына ұсынылған. «Somewhere in my Memory» композициясы «Фильмдегі үздік музыка» мен «Визуалды медиадағы үздік ән» категорияларында ұсынылды.

Home Alone: Original Motion Picture Soundtrack
№	Атауы	Музыкасы	Мәтіні	Ұзақтығы
1.	«Home Alone Main Title (Somewhere In My Memory)» (Chorus & Orchestra)	Джон Уильямс	Лесли Брикасс	4:53
2.	«Holiday Flight»	Джон Уильямс		0:59
3.	«The House»	Джон Уильямс		2:27
4.	«Star Of Bethlehem» (Orchestral Version)	Джон Уильямс		2:51
5.	«Man Of The House»	Джон Уильямс		4:33
6.	«White Christmas» (The Drifters тобының орындауында)	Ирвинг Берлин	Ирвинг Берлин	2:40
7.	«Scammed By A Kindergartner»	Джон Уильямс		3:55
8.	«Please Come Home for Christmas» (Southside Johnny-дың орындауында)	Чарльз Браун, Джин Редд	Чарльз Браун, Джин Редд	2:41
9.	«Follow That Kid!»	Джон Уильямс		2:03
10.	«Making The Plane»	Джон Уильямс		0:52
11.	«O Holy Night» (Chorus & Orchestra)	Адольф Адам	Джон Салливан Дуайт	2:48
12.	«Carol of the Bells» (Chorus)	Питер Вильговски	Питер Вильговски	1:25
13.	«Star Of Bethlehem» (Children’s Chorus)	Джон Уильямс	Лесли Брикасс	2:59
14.	«Setting The Trap»	Джон Уильямс		2:16
15.	«Somewhere In My Memory» (Chorus & Orchestra)	Джон Уильямс	Лесли Брикасс	1:04
16.	«The Attack On The House»	Джон Уильямс		6:53
17.	«Mom Returns And Finale»	Джон Уильямс		4:19
18.	«Have Yourself a Merry Little Christmas» (Мел Торменың орындауында)	Хью Мартин	Ральф Блейн	3:05
19.	«We Wish You a Merry Christmas / The End»	дәстүрлі	Лесли Брикасс, дәстүрлі	4:15
56:58

Жазбаның қатысушылары

Discogs сайтынаң алынған мәліметтер. Джон Уильямс — композитор (1—5, 7, 9, 10, 13—17 тректері) ; дирижер, продюсер (1—5, 7, 9—17, 19 тректері) Джо Энн Кейн —музыкалық дайындық Лесли Брикасс — лирика (1, 13, 15, 19 тректері) Адольф Адам — әуен (11 трек) Хью Мартин — әуен (18 трек) Southside Johnny— вокал (8 трек) Кеннет Уаннберг — музыкалық редактор Армин Стинер —дыбыс режиссері Чак Гарша — дыбыс режиссерінің көмекшісі Ирвинг Берлин — әуен, лирика (6 трек) Джон Салливан Дуайт — лирика (11 трек) Ральф Блейн — лирика (18 трек) Мел Торме — вокал (18 трек) Джон Бруно — дыбыс режиссерінің көмекшісі Терри Браун — дыбыс режиссерінің көмекшісі Говард Фрицсон — көркемдік жетекші, альбом мұқабасын безендіруші Чарльз Браун, Джин Редд — әуен, лирика (8 трек) Питер Вильговски — әуен, лирика (12 трек) The Drifters — вокал (6 трек)

Реакция

Кассалық жинақтар

«Үйде жалғыз қалғанда» Солтүстік Америкада 285,8 миллион доллар, басқа елдерде 190,9 миллион доллар жинаққа ие болған. Әлемдік прокаттағы толық жинақ сомасы 467,7 миллион долларды құрайды. Фильмнің бюджеті 18 миллион долларды құраған.

«Үйде жалғыз қалғанда» алғаш уик-эндте 1202 кинотеатрда көрсетіліп, 17 миллион доллар жинады (бір кинотеатрға шаққанда 14 211 доллар). Фильмнің үлкен танымалдығының арқасында кинотеатр экрандарынан ұзақ уақыт бойы түспеді. Кассалық жинақ бойынша 16 апта бойы бірінші орынды ұстаған - 1990 жылдың 16-18 қарашадан 1991 жылдың 1-3 ақпанға дейін. Дегенмен жинақтар бойынша ондықтағы орнын 1991 жылдың 26-27 сәуіріне дейін жоғалтпады. Кинотеатрлардағы көрсетілімдер басталғаннан тоғыз ай уақыт ішінде АҚШ-та 285 761 243 доллар жинап, Солтүстік Америкада сол жылдың ең үлкен кассалық жинақтарына ие болды. Гиннесстің рекордтар кітабіна барлық уақыттағы ең үлкен кассалық жинақтарға жеткен комедия ретінде енгізілген.

Кинотеатрлардағы көрсетілімдері біткен кезінде «Үйде жалғыз қалғанда» барлық уақыттағы кассалық жинақтар бойынша үшінші орынға қол жеткізді. Картинаның әлем бойынша толық жинақтары 477 561 243 долларды құрады. Box Office Mojo сайтының есептеуі бойынша АҚШ-та 67,7 миллион билет сатылған.

Сыншылардың пікірі

«Үйде жалғыз қалғанда» фильмінің кәсіби рейтингтері
Басылым	Баға
Metacritic	63/100
Rotten Tomatoes	5,5/10
Chicago Sun-Times
Entertainment Weekly	D
CinemaScore	A
The Austin Chronicle
TV Guide

«Үйде жалғыз қалғанда» сыншылардын әр түрлі пікірлеріне ие болды. Rotten Tomatoes сайтында 50 сыншының пікірлері бойынша 62% жағымды рейтингіне ие болды. Сыншылардың берген орташа бағасы 5,5/10 құрады. Metacritic сайтындағы орташа бағасы тоғыз сарапшының пікірлерінің негізінде мүмкінді жүз балдың алпыс үшіне ие болды. CinemaScore сайтындағы көрермендердің берген дауыстары бойынша «А» орташа бағасы қойылған (бағалау шкаласы «F»-тен «A+» дейін).

Американдық Varietyбасылымы «Үйде жалғыз қалғанда» фильмінің актерлік ұжымын мақтады. The Washington Post басылымының рецензиялаушысы Джин Купер фильмдегі әзілге деген көзқарасты мақтады. Дәл сол басылымның сыншысы Хэл Хинсон Крис Коламбустың режиссурасімен Калкинның актерлік ойыныңа тәнті болғанын айтады. The New York Times басылымының сыншысы Кэрин Джеймс фильмнің бірінші жартысы жалықтыратын көріністерге толы десе, екінші жартысындағы қара юморді жоғары бағалады. Сонымен қоса Кевинмен қарт Марлидің арасындағы диалогі мен фильмнің ақтық көріністерін мақтады. Уақыт өте «Үйде жалғыз қалғанда» көрермендер арасында мерекелік классикаға айналған. The Huffington Post, Thrillist, Empire, CinemaBlend басылымдары бүкіл уақыттағы жаңа жылдық фильмдердің ішіндегі ең үздіктердің бірі деп есептейді.

Марапаттары

1991 жылы фильм Home Alone: Original Motion Picture Soundtrack саундтрегі үшін «Фильмдегі үздік музыка», «Somewhere in my Memory» композициясы үшін «Фильмдегі үздік ән» номинацияларында «Оскар» сыйлығына ұсынылған. «Somewhere in my Memory» композициясы «Визуалды медиадағы үздік ән» номинациясында «Грэмми» сыйлығына ұсынылғанымен, жеңіске жете алмады. Маколей Калкин «Комедия немесе мюзиклдегі үздік ер адам рөлі» үшін, ал фильм «Комедия немесе мюзикл жанрындағы үздік фильм» номинацияларында «Алтын глобус» сыйлығына ұсынылып, жеңіске жетпеген. 1991 жылы фильм British Comedy Awards, Kids’ Choice Awards және «Жас актер» сыйлықтарының жүлдегерлері болды. Сол жылы 18 айдың ішінде сатылған 3 миллион билеттер үшін «Алтын экран», дәл сол уақыт ішінде сатылған 6 миллион билеттер үшін «Жұлдызды алтын экран» жүлделеріне ие болған. Американдық киноөнер институтінің «100 жылдың ішіндегі ең күлкілі 100 американдық фильмдері» тізіміне енгізілуге ұсынылған.

«Үйде жалғыз қалғанда» фильмінің жүлделері мен номинациялары
Жүлде	Жыл	Ұсынылған санат	Ұсынылған жұмыс	Жетістік
«Оскар»	1991	Фильмдегі үздік музыка	Home Alone: Original Motion Picture Soundtrack	Номинация
		Фильмдегі үздік ән	«Somewhere in my Memory»	Номинация
«Грэмми»	1992	Визуалды медиадағы үздік ән		Номинация
«Алтын глобус»	1991	Комедия немесе мюзикл жанрындағы үздік фильм	«Үйде жалғыз қалғанда»	Номинация
		Комедия немесе мюзиклдегі үздік ер адам рөлі	Маколей Калкин	Номинация
American Comedy Awards	1991	Ең күлкілі актер (Жетекші рөл)		Жеңіс
British Comedy Awards	1991	Үздік комедия	«Үйде жалғыз қалғанда»	Жеңіс
Artios Awards	1991	Комедиядағы үздік кастинг	Джейн Дженкинс, Джанет Хиршенсон	Жеңіс
«Чикаго сыншыларының жүлдесі»	1991	Келешегі зор актер	Маколей Калкин	Жеңіс
«Алтын экран»	1991	Алтын экран	«Үйде жалғыз қалғанда»	Жеңіс
		Жұлдызды алтын экран		Жеңіс
Kids’ Choice Awards	1991	Үздік кинобейне		Жеңіс
«Жас актер»	1991	Фильмдегі үздік жас актер	Маколей Калкин	Жеңіс
		Ең қызықты жасөспірімдер мен отбасылық фильм – Комедия немесе Экшен	«Үйде жалғыз қалғанда»	Жеңіс
		Фильмдегі екінші қатарлы үздік жас актриса	Анджела Геталс	Номинация

Сиквелдер

1992 жылы бірінші фильмдегі актерлік ұжымның қатысуымен Үйде жалғыз қалғанда 2: Нью-Йоркте жоғалған атты коммерциялық табысты жалғасы шықты. Режисері – бірінші фильмді түсірген Крис Коламбус, сценарий авторы мен продюсері тағы да Джон Хьюз болды. Бірінші фильмдегі «Лас жанды періштелер» атты фильмі «Үйде жалғыз қалғанда 2: Нью-Йоркте адасу»-да жалғасын тапты, бірақ «Өте лас жанды періштелер» деп аталды. «Періштелер» жайлы екі мета-ленталардың басты кейіпкері Джонни есімді стереотипті мафиози болды, оның рөлін Ральф Фуди орындады.

Франшизаның үшінші бөлімі Үйде жалғыз қалғанда 3 деген атпен 1997 жылы шықты. Фильмнің актерлық ұжымы мен сюжеті толықтай басқа болған. Сценариін тағы да Хьюз жазды. Режиссері - Раджа Госнелл. Басты рөлдерде Алекс Дэвид Линц пен Хэвиленд Моррис. Жоғары бюджетке қарамастан («Үйде жалғыз қалғанда»-ға қарағанда екі есе артық) кассалық жинақтары 79 миллион доллар ғана құрады.

Теледидарда ғана көрсетілімге түсірілген төртінші фильм «Үйде жалғыз қалғанда 4» деп аталды. Фильм 2002 жылдың 3 қарашасында ABC телеарнасында бірінші рет көрсетілді. Бұл фильм франшизаның алғашқы екі фильмдегі кейіпкерлер жайлы болғанымен, олардың рөлдерін басқа актерлер сомдаған. Картинаның режиссері Род Дэниел, сценариін Дебра Франк пен Стивен Хэйз жазған. Кевин Маккаллистердің рөлін Майк Вейнберг орындады. Сонымен қатар фильмге Френч Стюарт, Мисси Пайл, Джейсон Бех, Эрик Авари сынды актерлар қатысқан.

2012 жылдың 25 қарашасында «Үйде жалғыз қалғанда 5: Мерекелік ұрлық» атты соңғы бөлімі ABC Family телеарнасында көрсетілді.. Сценариін Аарон Гинбург және Уэйд МакИнтаер жазды. Картинаны режиссер Питер Хьюитт түсірді. Басты рөлдерді Кристиан Мартин, Эдди Стиплз, Джодель Ферланд, Дог Муррэй, Элли Харви, Деби Мейзар және Малкольм Макдауэлл орындады.

Қызықты деректер

• Фрэнк ағайдың рөлі арнайы Келси Грэммер үшін жазылған.
• Фильмнің мұқабасындағы екі қолымен бетін ұстап бақырған Кевиннің бейнесі Эдвард Мунктің «Айқай» атты суретінің негізінде жасалған.
• Джон Кэндидің бос уақытының аздығын, фильмге бір күнін ғана бөле алды. Оның кейіпкері қатысатын эпизодтардың барлығы тоқтаусыз 23 сағатта түсірілген.
• Гарридің рөліне Роберт Де Ниро шақырылған, дегенмен актер бұл рөлден бас тартқан.
• Фильмге Крис Коламбус отбасы мүшелері де қатысты. Жұбайы Моника Деверо стюардессаның, ал қайын атасы полиция қызметкерінің рөлдерінде ойнады. Сонымен қатар Коламбустың енесі мен кішкентай Элеанор есімді қызың эпизодтық көріністерден байқауға болады.
• Фильмдегі Кевин сызған жоспар-сызбасын шынында да Маколейдің өзі сызған болатын.
• Фильмдегі өрмекшіге қатысты эпизодты түсіру барысында расымен өте улы тарантул өрмекші қолданылды. Сондықтан Дэниел Стерн айғайлаған жоқ. Себебі, тым қатты айғай өрмекшіні шошытып, соңы жаман болу мүмкін еді.
• Базздың бөлмесінде американдық Айс-Ти есімді рэп орындаушысы бейнелген плакатты байқауға болады

Сыртқы сілтемелер

• «Үйде жалғыз қалғанда» (ағыл.) Internet Movie Database сайтында
• «Үйде жалғыз қалғанда» (ағыл.) TCM Movie Database сайтында
• «Үйде жалғыз қалғанда» (ағыл.) Box Office Mojo сайтында
• «Үйде жалғыз қалғанда» (ағыл.) Rotten Tomatoes сайтында
• «Үйде жалғыз қалғанда» (ағыл.) Metacritic сайтында
• «Үйде жалғыз қалғанда» (ағыл.) Мұрағатталған 19 тамыздың 2012 жылы. The Numbers сайтында

Пайдаланылғын әдебиеттер

Todd Strasser, John Hughes— Home Alone — басылып шыққан. — Scholastic, 1991. — 136 б. — ISBN 978-0590446686. Kirk Honeycutt, Крис Коламбус— John Hughes: A Life in Film: The Genius Behind Ferris Bueller, The Breakfast Club, Home Alone, and more (ағыл.) — 2015. — 224 б. William Goldman, Herb Gardner— The Big Picture? Who Killed Hollywood and Other Essays (ағыл.) — безендірілген. — Applause Theatre Books, 2001. — Б. 49. — 283 б. — ISBN 978-1557834607.

20th Century Fox, John Hughes— Home Alone: The Authorized Coloring Book — басылып шыққан. — Harper Design, 2016. — 80 б. — ISBN 978-0062493019. Phoebe Hoban— Raging Joe Pesci: «GoodFellas» Psycho Shoots For an Oscar (ағыл.) // Francesca Stanfill, Joe Klein, Jennifer Cecil — New York Magazine : журнал. — Нью-Йорк - 1991 ж.. — № 8. — б. 32-37.