Дәурен Зекенұлы Әділбеков

Дәурен Зекенұлы Әділбеков
Туған күні	14 мамыр 1956 (1956-05-14) (67 жас)
Туған жері	Үржар, Семей облысы
Азаматтығы	Қазақстан
Білімі	Новосібір электртехникалық институты (1979), Мәскеу халық шаруашылық академиясы (1994)
Партиясы	Нұр Отан

Әділбеков Дәурен Зекенұлы (1956 жылы 14 мамырда Семей облысы Үржар ауылында туған) - Ақмола облысынан сайланған Қазақстан Республикасы Парламент Сенатының депутаты (2017 жылдан бері).

Өмірбаяны

Әкесі - Әділбеков Зекен Уалханұлы, зейнеткер, Алматы қаласы Алмалы аудандық Ардагерлер кеңөсінің төрағасы. Анасы - Көкешева Сахария, зейнеткер.

Новосібір электртехникалық институтын (1979) инженер-электр механигі мамандығы бойынша; Мәскеу халық шаруашылық академиясын (1994) жоғары дәрежелі менеджер мамандығы бойынша бітірген. Экономика ғылымдарының докторы (1997). Докторлық диссертациясының тақырыбы: «Ірі қалалардың тіршілік етуін қамтамасыз ету жүйелерін үлгілеу және оңтайландыру». ҚР БҒМ Білім және ғылым саласындағы бақылау жөніндегі комитетінің экономика профессоры (2009 жылдан).

«Кәсіпорынды басқарудағы экономикалық-математикалық әдістер» (1992), «Компьютер өндірісі және қоршаған орта» (1993), «Қаланың тіршілікпен қамтамасыз етуші коммуникациялары» (1994) кітаптарының; 40-тан астам ғылыми жарияланымның авторы.

«Нұр Отан» ХДП мүшесі (2003 жылдан).

1974 жылдың ақпанынан - Семей облысы Үржар ауданының «Бақты» кеңшарында слесарь-электрик.

1974 жылдың қыркүйегінен - Новосібір электртехникалық институтының студенті.

1979 жылдан - Алматы қаласының №1 троллейбус паркінде шебер, аға шебер, цех бастығы.

1984 жылдан - Алматы қалалық трамвай депосының бас инженері, директоры.

1989 жылдан - Алматы қаласы Совет аудандық атқару комитеті төрағасының орынбасары.

1992 жылдан - Алматы қаласы Совет аудандық әкімшілігі басшысының бірінші орынбасары.

1994 жылдан - ҚР Жоғарғы Кеңесінің депутаты.

1995 жылдан - Қазақстан Кәсіпкерлікті қолдау және дамыту орталығы бас директорының бірінші орынбасары (Алматы).

1997 жылдың наурызынан - Көкшетау облысы әкімінің бірінші орынбасары.

1997 жылдың мамырынан - Солтүстік Қазақстан облыстық экономика басқармасының бастығы.

1997 жылдың қарашасынан - ҚР Премьер-министрі Кеңсесінің сараптау-талдау бөлімінің сектор меңгерушісі.

2004 жылдың мамырынан - Ақмола облысы Көкшетау қаласының әкімі.

2004 жылдың қазанынан - Ақмола облысы әкімінің орынбасары.

2005 жылдан - Көкшетау экономика және менеджмент институты экономика және менеджмент кафедрасының профессоры.

2006 жылдан - «ҚТЖ» ҰК» АҚ «Темір жол жылу» АҚ вице-президенті (Көкшетау).

2008 жылдың наурызынан - ҚР Қоршаған ортаны қорғау министрлігі Есіл экология департаменті бастығының м.а. (Астана).

2008 жылдың шілдесінен - Көкшетау экономика және менеджмент институты экономика және менеджмент кафедрасының профессоры.

2008-2017 жылдары - Ақмола облысы әкімінің орынбасары.

2017 жылдың ақпан айынан шілде айына дейін - Ақмола облысының бірінші орынбасары.

2017 жылдан бастап - Қазақстан Республикасы Парламенті Сенатының депутаты. 2017 жылдың қыркүйек айынан бастап 2019 жылдың тамыз айы аралығында - Қаржы және бюджет комитетінің мүшесі. 2019 жылдың қыркүйек айынан бастап - Экономикалық саясат, инновациялық даму және кәсіпкерлік комитетінің хатшысы.

«Құрмет» орденімен (2010), «Астана» медалімен (1998) марапатталған.

Әскери атағы - подполковник.

Үйленген. Жұбайы - Дәуренбекова Ботагөз Жұмабекқызы (1955 ж.т.). Ұлы - Әділбеков Дамир Дәуренұлы (1981 ж. т.).