Қазақстан — Оман қатынастары
Қазақстан — Оман қатынастары — Қазақстан Республикасы мен Оман Сұлтандығы арасындағы қарым қатынастар. Дипломатиялық қатынастар 1992 жылғы 27 сәуірде орнатылды.
Дипломатия[өңдеу | қайнарын өңдеу]
Масқаттағы Қазақстан Республикасының Елшілігі 2010 жылдың 15 қазанда ашылды. Қазақстандағы Оман Елшілігі 2006 жылдың тамыз айынан бастап жұмыс істейді.
2019 жылдың мамырында Нажмедин Мұхаметәліұлы Қазақстан Республикасының Оман Сұлтандығындағы Елшісі болып тағайындалды.
2020 жылғы наурыздан бастап Оман Сұлтандығының Қазақстан Республикасындағы Елшісі лауазымына Мұхаммед әл-Бахрани тағайындалды
2022 жылы Қазақстан мен Оман дипломатиялық қарым-қатынастардың 30-жылдығын атап өтуде. Тәуелсіздік жылдарында Қазақстан-Оман ынтымақтастығы тұрақты және серпінді дамып, саясат, экономика, сауда, мәдениет және туризм салаларындағы қатынастар дәйекті түрде нығайтылды.
Сапарлар[өңдеу | қайнарын өңдеу]
Екіжақты қарым-қатынастарда Қазақстан Республикасының Тұңғыш Президенті Н.Ә.Назарбаевтың 1997 жылы қыркүйекте Оманға алғашқы ресми сапары тарихи маңызға ие болды.
Экономикалық және мәдени-гуманитарлық салалардағы екіжақты ынтымақтастықты дамыту шеңберінде 2008 жылдың 15-18 наурызында Сұлтан Қабус бен Саидтің шақыруымен Тұңғыш Президент Н.Ә.Назарбаевтың Оманға екінші сапары өтті.
Парламентаралық ынтымақтастық өз жалғасын табуда. 2019 жылғы 23-24 қыркүйекте Астана қаласында өткен Еуразиялық парламентшілер спикерлерінің IV-отырысына Оман Консультативтік кеңестің (Парламенттің төменгі палатасы) Төрағасы Халид Әл-Мауали қатысты. Сапар барысында ол ҚР Тұңғыш Президенті Н.Ә.Назарбаевпен, ҚР Парламентінің екі палатасының спикерлері және ҚР Премьер-Министрімен кездесті.
2019 жылғы 9-10 желтоқсанда ҚР Парламенті Сенаты Төрағасының орынбасары Б.Бекназаров Оманға сапармен барды. Сапар барысында қазақстандық делегация Оман Мемлекеттік Кеңестің (жоғарғы палата) төрағасы Яхя әл-Манзери, оның орынбасары Әл-Хаттаб әл-Хинаимен және Консультативтік Кеңестің (төменгі палата) төрағасы шейх Халед әл-Мауалимен кездесті.
Сауда[өңдеу | қайнарын өңдеу]
Екі ел арасындағы іскерлік әріптестіктің серпінділігі байқалуда. 2022 жылғы қаңтар-тамыз аралығында Қазақстан мен Оман арасындағы тауар айналымы 5,6 млн АҚШ долл. жетті. Екі ел арасындағы тауар айналымы 2021 жылы 2,8 млн. АҚШ долл., 2020 жылы 273,5 мың АҚШ долл., ал 2019 жылы 472 мың АҚШ долл. құраған болатын.
2005 және 2020 жж. желтоқсан аралығында Оманнан Қазақстанға тікелей инвестициялардың жалпы ағыны 253,4 млн. АҚШ долларын құрады. Оманның «OQ» мемлекеттік мұнай компаниясы Халықаралық консорциум шеңберінде Қазақстандағы «Дунга» мұнай кен орынын игеруге қатысады.
Виза[өңдеу | қайнарын өңдеу]
2019 жылдың қыркүйегінен бастап Қазақстан Оман азаматтары үшін бір ай мерзімге визасыз режим енгізді. 2022 жылдың сәуір айынан бастап Оманда Қазақстан азаматтары үшін 14 күндік визасыз режим жарияланды. Ынтымақтастық туризм, транзит-көлік және басқа да салаларда белсенді дамып келеді. [1]
Дереккөздер[өңдеу | қайнарын өңдеу]
- ↑ Қазақстанның Омандағы Елшілігі Қазақстан-Оман қарым қатынастары (қаз.). Тексерілді, 31 тамыз 2023.
